សិក្ខាសាលាស្តីពី “ការពង្រឹងសមត្ថភាពលើការគ្រប់គ្រងបណ្តាញខាងក្នុង និងការគ្រប់គ្រងប្រព័ន្ធវីដេអូនៃសន្និសីទ”
រាជធានីភ្នំពេញ៖ ព្រឹកថ្ងៃចន្ទ ០១កើត ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី0៣ ខែមិថុនា ឆ្នាំ២០១៩ នៅទីស្តីការក្រសួង ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានអញ្ជើញជាអធិបតីបើកសិក្ខាសាលាស្តីពី “ការពង្រឹងសមត្ថភាពលើការគ្រប់គ្រងបណ្តាញខាងក្នុង និងការគ្រប់គ្រងប្រព័ន្ធវីដេអូនៃសន្និសីទ” ដែលប្រព្រឹត្តទៅរយៈពេល ០២ថ្ងៃ ចាប់ពីថ្ងៃទី០៣ ដល់ថ្ងៃទី០៤ ខែមិថុនា ឆ្នាំ២០១៩ ដោយមានការអញ្ជើញចូលរួមពីសិក្ខាកាមមកពីបណ្តាក្រសួង-ស្ថាប័ន រាជធានី-ខេត្ត កងយោធពលខេមរភូមិន្ទ និងនគរបាលជាតិ ដែលពាក់ព័ន្ធនឹងការគ្រប់គ្រងបណ្តាញ និងប្រព័ន្ធវីដេអូនៃសន្និសីទរបស់រាជរដ្ឋាភិបាលកម្ពុជា សម្រាប់កិច្ចប្រជុំពេញអង្គគណៈរដ្ឋមន្ត្រី សរុបចំនួន១៣០រូប។
ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍
ឯកឧត្តមរដ្ឋលេខាធិការ សុខ ពុទ្ធិវុធ បានមានប្រសាសន៍ថា រាល់កិច្ចប្រជុំពេញអង្គគណៈរដ្ឋមន្ត្រី មន្ត្រីបច្ចេកទេសនៃក្រសួងប្រៃសណីយ៍និងទូរគមនាគមន៍ តែងតែធ្វើការសាកល្បងប្រព័ន្ធវីដេអូនៃសន្និសីទរបស់រាជរដ្ឋាភិបាលដើម្បីត្រៀមសម្រាប់ធ្វើការផ្សាយផ្ទាល់អំពីកិច្ចប្រជុំពេញអង្គគណៈរដ្ឋមន្ត្រីក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទៅកាន់បណ្តាក្រសួង-ស្ថាប័ន រាជធានី-ខេត្ត កងយោធពលខេមរភូមិន្ទ និងនគរបាលជាតិ ដែលពាក់ព័ន្ធ។ សិក្ខាសាលានេះនឹងឆ្លុះបញ្ចាំងនូវការសហការគ្នាយ៉ាងជិតស្និទ្ធរវាងស្ថាប័នរដ្ឋ និងឯកជនលើវិស័យបច្ចេកវិទ្យាគមនាគមន៍និងព័ត៌មាន និងការចែករំលែកចំណេះដឹង បទពិសោធន៍ បញ្ហាប្រឈមផ្សេងៗពាក់ព័ន្ធនឹងវិស័យនេះទៅវិញទៅមក។ ឯកឧត្តមរដ្ឋលេខាធិការ សង្ឃឹមយ៉ាងមុតមាំថា សិក្ខាកាមទាំងអស់នឹងទទួលបាននូវចំណេះដឹង និងបទពិសោធន៍ល្អៗដើម្បីជាប្រយោជន៍ដល់ការអភិវឌ្ឍសា្ថប័នរបស់ខ្លួន និងចូលរួមដោះស្រាយបញ្ហានៅតាមអង្គភាពបានយ៉ាងមានប្រសិទ្ធភាព៕
