ឯកឧត្តមរដ្ឋមន្ត្រី ត្រាំ អុីវតឹក អញ្ជើញប្រកាសតែងតាំងថ្នាក់ដឹកនាំ និងមន្រ្តីរាជការនៃក្រសួងប្រៃសណីយ៍និងទូរគមនាគមន៍
រាជធានីភ្នំពេញ៖ រសៀលថ្ងៃចន្ទ ០១កើត ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី0៣ ខែមិថុនា ឆ្នាំ២០១៩ នៅទីស្តីការក្រសួង ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអញ្ជើញជាអធិបតីដ៏ខ្ពង់ខ្ពស់ក្នុងពិធីប្រកាសតែងតាំង ប្រធាន-សមាជិកនិយ័តករទូរគមនាគមន៍ ទីប្រឹក្សា អគ្គនាយករង អនុប្រធាននាយកដ្ឋាន ប្រធានការិយាល័យ និងអនុប្រធានការិយាល័យ នៃក្រសួងប្រៃសណីយ៍និងទូរគមនាគមន៍។ ដោយមានការចូលរួមពីសំណាក់ ឯកឧត្ដម លោកជំទាវ លោក លោកស្រី ជាថ្នាក់ដឹកនាំ និងមន្រ្តីរាជការ នៃក្រសួងប្រៃសណីយ៍ និងទូរគមនាគមន៍ យ៉ាងច្រើនកុះករផងដែរ។
ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍
ក្នុងឱកាសនេះដែរ ឯកឧត្តមរដ្ឋមន្ត្រី បានសំណូមពរដល់មន្ត្រីរាជការ ដែលបានប្រកាសតែងតាំងថ្មីនាពេលនេះ សូមមានស្មារតីទទួលខុសត្រូវលើភារកិច្ចការងារប្រចាំថ្ងៃ ដែលថ្នាក់ដឹកនាំប្រគល់ឱ្យបានល្អ និងសូមធ្វើការដោយមានកិច្ចសហការ ជាមួយថ្នាក់ដឹកនាំតាមឋានានុក្រម ដើម្បីបង្កើននូវទំនាក់ទំនងល្អ ការសិក្សារៀនសូត្រ ដកស្រង់បង្កើនបទពិសោធន៍ និងចំណេះដឹងវិជ្ជាជីវៈថ្មីៗបន្ថែមទៀត។ ម្យ៉ាងទៀតក៏ត្រូវមានទំនាក់ទំនងល្អជាមួយមន្ត្រីថ្នាក់ក្រោម ដោយដើរតួជាអ្នកដឹកនាំ សម្របសម្រួលការងារ និងធ្វើខ្លួនឱ្យបានជាគម្រូដល់មន្ត្រីថ្នាក់ក្រោម ដោយស្មារតីទទួលខុសត្រូវខ្ពស់ គោរពនូវអភិក្រមទាំង០៥ គឺ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ និងត្រូវគោរពទៅតាមក្រឹត្យក្រមនៃច្បាប់ ដោយមានឥរិយាបថល្អក្នុងការបំពេញការងារប្រកបដោយ ឆន្ទៈម្ចាស់ការ ភក្តីភាព និងមនសិការវិជ្ជាជីវៈ៕
ឯកឧត្តម លីវ គឹមហេង អគ្គនាយក នៃអគ្គនាយកដ្ឋានរដ្ឋបាល
