ឯកឧត្តមរដ្ឋមន្ត្រី ត្រាំ អុីវតឹក អញ្ជើញជួបសំណេះសំណាលជាមួយប្រជាពលរដ្ឋ ឃុំផ្លូវទូក និងឃុំប្រឡាយមាស ក្នុងស្រុកកំពង់លែង ខេត្តកំពង់ឆ្នាំង
ព្រឹកថ្ងៃសៅរ៍ ១៣កើត ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៥ ខែមិថុនា ឆ្នាំ២០១៩ នៅឃុំប្រឡាយមាស ស្រុកកំពង់លែង ឯកឧត្ដម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ និងជាប្រធានក្រុមការងារថ្នាក់កណ្តាលចុះជួយស្រុកទឹកផុសនិងស្រុកកំពង់លែង រួមជាមួយឯកឧត្តម លោកជំទាវ លោក លោកស្រី ជាប្រតិភូអមដំណើរ បានអញ្ជើញជាអធិបតីក្នុងពិធីសំណេះសំណាលជាមួយប្រជាពលរដ្ឋ និងចែកជូនអំពូលសូឡា ដល់ប្រជាពលរដ្ឋចំនួន២០០គ្រួសារ ស្ថិតក្នុងឃុំផ្លូវទូក និងឃុំប្រឡាយមាស ស្រុកកំពង់លែង ខេត្តកំពង់ឆ្នាំង។
ឯកឧត្ដមរដ្ឋមន្ត្រី បានមានប្រសាសន៍ថា ដោយពិនិត្យឃើញស្ថានភាពរស់នៅរបស់ប្រជាពលរដ្ឋឃុំផ្លូវទូក និងឃុំប្រឡាយមាស មិនទាន់មានអគ្គិសនីប្រើប្រាស់នៅឡើយ ក្រុមការងារបាននាំយកគ្រឿងបរិក្ខារ អំពូលសូឡា ជូនដល់គ្រួសារដែលក្រីក្រ ដើម្បីសម្រួលដល់ការប្រើប្រាស់ប្រចាំថ្ងៃអោយមានភាពងាយស្រួលជាងមុន និងដើម្បីលើកស្ទួយកម្រិតជីវភាពអោយកាន់តែមានភាពប្រសើរឡើងផងដែរ។ ក្នុងឱកាសនោះ ឯកឧត្តមរដ្ឋមន្ត្រី បានប្រគល់ជូនឧបករណ៍អំពូលសូឡា អានុភាព ១០វ៉ាត់ ចំនួន២០០ ដល់ប្រជាពលរដ្ឋឃុំផ្លូវទូកចំនួន ១១២គ្រួសារ និងឃុំប្រឡាយមាស ចំនួន ៨៨គ្រួសារ និងប្រគល់ពិល ចំនួន២០០គ្រឿង សម្រាប់ប្រជាការពារ និងអាជ្ញាធរឃុំទាំងពីរសម្រាប់ប្រើប្រាស់។ ហើយបានឧបត្ថម្ភថវិកា សម្រាប់ជីកស្រះទឹកទំហំ ៤០ម X ៨០ម នៅឃុំផ្លូវទូក ផងដែរ។
នាព្រឹកថ្ងៃដដែល ឯកឧត្ដម ត្រាំ អ៊ីវតឹក និងប្រតិភូអមដំណើរ ក៏បាននាំយកអំណោយរបស់ សាខាកាកបាទក្រហមកម្ពុជា ខេត្តកំពង់ឆ្នាំង ប្រគល់ជូនដល់ប្រជាពលរដ្ឋក្រីក្រចំនួន ១០គ្រួសារ(ឃុំផ្លូវទូក ៥គ្រួសារ និងឃុំប្រឡាយមាស ៥គ្រួសារ) ដែលចាស់ជរានិងជួបការលំបាក នូវគ្រឿងឧបភោគបរិភោគ និងថវិកាមួយចំនួនផងដែរ៕
