លោកជំទាវរដ្ឋលេខាធិការ ប្រាក់ ច័ន្ទណយ បានដឹកនាំគណៈប្រតិភូក្រសួងប្រៃសណីយ៍និងទូរគមនាគមន៍ ចូលរួមវេទិកាអាជីវកម្មប្រៃសណីយ៍ របស់សហភាពប្រៃសណីយ៍អាស៊ីប៉ាស៊ីហ្វិក នៅទីក្រុងបាងកក ប្រទេសថៃ
ប្រទេសថៃ៖ លោកជំទាវ ប្រាក់ ច័ន្ទណយ រដ្ឋលេខាធិការក្រសួងប្រៃសណីយ៍និងទូរគមនាគមន៍ បានដឹកនាំគណៈប្រតិភូក្រសួង ចូលរួមវេទិកាអាជីវកម្មប្រៃសណីយ៍លើកទី៨ របស់សហភាពប្រៃសណីយ៍អាស៊ីប៉ាស៊ីហ្វិក ដែលបានប្រព្រឹត្តទៅចាប់ពីថ្ងៃទី០២ ដល់ថ្ងៃទី០៤ ខែធ្នូ ឆ្នាំ២០១៩ នៅទីក្រុងបាងកក ព្រះរាជាណាចក្រថៃ។
វេទិកាអាជីវកម្មប្រៃសណីយ៍លើកទី៨នេះត្រូវបានរៀបចំឡើងដើម្បីពិភាក្សានិងផ្លាស់ប្តូរយោបល់គ្នា តាមរយៈការធ្វើបទបង្ហាញទាក់ទងនឹងបញ្ហាប្រឈមនានាក្នុងវិស័យប្រៃសណីយ៍ គំនិតច្នៃប្រឌិត និងដំណោះស្រាយថ្មីៗ ក្នុងចំណោមភាគីពាក់ព័ន្ធក្នុងវិស័យប្រៃសណីយ៍ រួមបញ្ចូលទាំងបញ្ញត្តិករ ប្រតិបត្តិករប្រៃសណីយ៍ និងក្រុមហ៊ុនផ្គត់ផ្គង់បច្ចេកទេសថ្មីៗដែលជាដំណោះស្រាយដល់បញ្ហាប្រឈម ក្នុងវិស័យប្រៃសណីយ៍។
វេទិកានេះបានផ្តោតលើប្រធានបទទាក់ទងនឹងទិសដៅយុទ្ធសាស្ត្ររបស់ប្រទេសនិមួយៗ ឆ្លើយតបនឹងការប្រែប្រួលនៃតម្រូវការទីផ្សារ ពិសេសជាមួយការកើនឡើងនៃពាណិជ្ជកម្មអេឡិកត្រូនិកដោយឆ្លងកាត់ព្រំដែន។ ជាមួយគ្នានេះ វេទិកាបានពិភាក្សាលើការបំលាស់ប្តូរឌីជីថល ការប្រើប្រាស់កម្មវិធី បច្ចេកវិទ្យា និង នវានុវត្តន៍ថ្មីៗក្នុងវិស័យប្រៃសណីយ៍ផងដែរ។
តាមរយ:វេទិកានេះ បានផ្តល់នូវអត្ថប្រយោជន៍ក្នុងការស្វែងយល់ពីការប្រឈម និងយុទ្ធសាស្ត្រ ក៏ដូចជាដំណោះស្រាយដែលប្រទេសសមាជិកនីមួយៗបានព្យាយាមក្នុងការដោះស្រាយ ពិសេសការបញ្ចូលនូវបច្ចេកវិទ្យាឌីជីថលថ្មីៗដែលបង្កើននូវប្រសិទ្ធភាពការងារ បង្កើននូវភាពប្រកួតប្រជែង និងការឆ្លើយតបទៅនឹងនិន្នាការប្រែប្រួលនៃតម្រូវការ បែបផែនជីវិតថ្មី និងការវិវត្តន៍យ៉ាងឆាប់រហ័សនៃបច្ចេកវិទ្យា៕
