ឯកឧត្តមរដ្ឋលេខាធិការ សុខ ពុទ្ធិវុធ អញ្ជើញដឹកនាំកិច្ចប្រជុំពិភាក្សាអំពីស្ថានភាពនិងការវិវត្តនៃក្តារចុចភាសាខ្មែរនិងពុម្ពអក្សរខ្មែរ
រាជធានីភ្នំពេញ៖ នារសៀលថ្ងៃពុធ ១៥កើត ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃ១១ ខែធ្នូ ឆ្នាំ២០១៩ នៅទីស្តីការក្រសួង ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ បានអញ្ជើញដឹកនាំកិច្ចប្រជុំពិភាក្សាអំពីស្ថានភាពនិងការវិវត្តនៃក្តារចុចភាសាខ្មែរនិងពុម្ពអក្សរខ្មែរ (Khmer Fonts and Khmer Keyboard Layout) ក្នុងប្រព័ន្ធដំណើរការកុំព្យូទ័រ ប្រព័ន្ធដំណើរការទូរស័ព្ទ និង ឧបករណ៍ឆ្លាតវៃ ជាមួយអ្នកជំនាញនិងអ្នកស្រាវជ្រាវអញ្ជើញមកពីក្នុងនិងក្រៅប្រទេស។
ក្ដារចុចភាសាខ្មែរ Unicode និងពុម្ពអក្សរខ្មែរបានចូលរួមចំណែកក្នុងការជួយសន្សំសំចៃពេលវេលាជាច្រើនក្នុងការវាយអត្ថបទ ឬឃ្លារឃ្លោងជាភាសាខ្មែរ ក៏ដូចជាជំរុញឱ្យមានការប្រើប្រាស់ភាសាខ្មែរនៅលើបណ្ដាញអុីនធឺណិត។
ក្រសួងប្រៃសណីយ៍និងទូរគមនាគមន៍ មានបំណងធ្វើទំនើបកម្មស្តង់ដាក្ដារចុចភាសាខ្មែរ និងពុម្ពអក្សរខ្មែរ ដែលសមស្របទៅនឹងយុគ្គសម័យឌីជីថល កាត់បន្ថយពេលវេលាក្នុងការវាយអត្ថបទ និងផ្តល់ភាពងាយស្រួលច្រើនដល់អ្នកប្រើប្រាស់ ជាពិសេសចូលរួមចំណែកក្នុងការជម្រុញការផ្ដល់សេវាសាធារណ:តាមប្រព័ន្ធឌីជីថល ស្របតាមយុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាលឆ្ពោះទៅកាន់រដ្ឋាភិបាលឌីជីថលនិងសេដ្ឋកិច្ចឌីជីថល៕
