ឯកឧត្ដមរដ្ឋមន្ត្រី ជា វ៉ាន់ដេត បានទទួលជួបសម្តែងការគួរសមនិងពិភាក្សាការងារជាមួយឯកឧត្តម Martin Vavra ឯកអគ្គរដ្ឋទូតនៃសាធារណរដ្ឋឆែក ប្រចាំនៅព្រះរាជាណាចក្រកម្ពុជា

រាជធានីភ្នំពេញ៖ នារសៀលថ្ងៃទី៥ ខែធ្នូ ឆ្នាំ២០២២ នៅទីស្តីការក្រសួង ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍បានទទួលជួបសម្តែងការគួរសមនិងពិភាក្សាការងារជាមួយឯកឧត្តម Martin Vavra ឯកអគ្គរដ្ឋទូតនៃសាធារណរដ្ឋឆែកប្រចាំនៅព្រះរាជាណាចក្រកម្ពុជា។

ជាកិច្ចចាប់ផ្តើម ឯកឧត្តមឯកអគ្គរដ្ឋទូតបានជម្រាបជូនគោលបំណងនៃជំនួបនេះគឺដើម្បីពិភាក្សាស្វែងរកកិច្ចសហប្រតិបត្តិការបន្ថែមទៀតរវាងសាធារណរដ្ឋឆែក និងព្រះរាជាណាចក្រកម្ពុជា ជាពិសេសទាក់ទងនឹងវិស័យសន្តិសុខសាយប័រ និងការរៀបចំសិក្ខាសាលារួមគ្នា ដោយផ្តោតលើប្រធានបទជុំវិញវិស័យសន្តិសុខសាយប័រនេះ នាពេលខាងមុខ។

ជាការឆ្លើយតប ឯកឧត្ដមរដ្ឋមន្ត្រី បានស្វាគមន៍យ៉ាងកក់ក្តៅចំពោះវត្តមានរបស់ ឯកឧត្តមឯកអគ្គរដ្ឋទូត Martin Vavra ហើយបានគាំទ្រចំពោះគំនិតផ្តួចផ្តើមរបស់ ឯកឧត្តមក្នុងការរៀបចំសិក្ខាសាលារួមគ្នានេះ។ ឆ្លៀតក្នុងឱកាសនោះដែរ ឯកឧត្ដមរដ្ឋមន្ត្រី បានជម្រាបជូនបន្ថែមដល់ ឯកឧត្តមឯកអគ្គរដ្ឋទូត អំពីសេចក្តីព្រាងច្បាប់ស្តីពីសន្តិសុខសាយប័រ សេចក្តីព្រាងច្បាប់ស្តីពីឧក្រិដ្ឋកម្មបច្ចេកវិទ្យាព័ត៌មាន សេចក្តីព្រាងច្បាប់ស្តីពីកិច្ចការពារអ្នកប្រើប្រាស់ ដែលជាកិច្ចខិតខំប្រឹងប្រែងរបស់ក្រសួង និងរាជរដ្ឋាភិបាលក្នុងគោលដៅរក្សា សន្តិសុខក្នុងប្រព័ន្ធសាយប័រជូនដល់សង្គមជាតិកម្ពុជា។

ឯកឧត្ដមរដ្ឋមន្ត្រី បានស្នើដល់រដ្ឋាភិបាលនៃសាធារណរដ្ឋឆែកតាមរយៈឯកឧត្តម Martin Vavra ក្នុងការផ្តល់អាហារូបករណ៍លើជំនាញសន្តិសុខសាយប័រ ដើម្បីជួយជំរុញនិងបំពេញបន្ថែមដល់ធនធានមនុស្សរបស់កម្ពុជាក្នុងវិស័យនេះ ហើយឯកឧត្ដមរដ្ឋមន្ត្រីក៏បានជំរុញ និងលើកទឹកចិត្តឱ្យមានការវិនិយោគពីក្រុមហ៊ុនឆែកមកកម្ពុជាបន្ថែមទៀត ជាពិសេសលើវិស័យសន្តិសុខសាយប័រ។

ទទួលបានព័ត៌មានមុនគេ សូមចូលឆាណែលតេឡេក្រាមក្រសួង https://t.me/mptcgovkh