ក្រសួងប្រៃសណីយ៍និងទូរគមនាគមន៍ បើកពិគ្រោះយោបល់លើ មគ្គទេសក៍អាស៊ានសម្រាប់អភិបាលកិច្ច GenAI
ក្រសួងប្រៃសណីយ៍និងទូរគមនាគមន៍ (ក.ប.ទ.) មានកិត្តិយសសូមជម្រាបជូនដល់ក្រុមហ៊ុនបច្ចេកវិទ្យាឌីជីថល ក្រុមហ៊ុន គ្រឹះស្ថាន អង្គការ និងស្ថាប័នទាំងអស់មេត្តាជ្រាបថា
ក.ប.ទ. សូមបើកការពិគ្រោះយោបល់លើសេចក្ដីព្រាង “មគ្គទេសក៍បន្ថែមរបស់អាស៊ានស្ដីពីអភិបាលកិច្ចនិងសីលធម៌បញ្ញាសិប្បនិម្មិត សម្រាប់បញ្ញាសិប្បនិម្មិតបង្កើតមាតិកា” (Expanded ASEAN Guide on AI Governance and Ethics – Generative AI) ចាប់ពីថ្ងៃជូនដំណឹងនេះ រហូតដល់ថ្ងៃទី១៦ ខែតុលា ឆ្នាំ២០២៤។ ការពិគ្រោះយោបល់នេះ ធ្វើឡើងស្របតាមស្មារតី ក្រុមការងារអភិបាលកិច្ចបញ្ញាសិប្បនិម្មិត របស់ឧត្ដមមន្ត្រីឌីជីថលអាស៊ាន ដោយមានការសម្របសម្រួលពី អគ្គលេខាធិការដ្ឋានអាស៊ាន។
សាវតារ
បច្ចេកវិទ្យាបញ្ញាសិប្បនិម្មិត (AI) ជាបច្ចេកវិទ្យាព័ត៌មានដែលមានការប្រើប្រាស់ជាយូរមកហើយក្នុងវិស័យបច្ចេកវិទ្យាគមនាគមន៍និងព័ត៌មាន។ ប៉ុន្តែក្នុងរយៈពេល២ឆ្នាំចុងក្រោយនេះ ពិភពលោកងាកមកចាប់អារម្មណ៍លើAIកាន់តែខ្លាំង ដោយសារការរីកដុះដាលនៃបញ្ញាសិប្បនិម្មិតបង្កើតមាតិកា (Generative AI ឬ GenAI)។ ក្នុងកិច្ចប្រជុំរដ្ឋមន្ត្រី ជីថលអាស៊ានលើកទី៤ កាលពីខែកុម្ភៈ ឆ្នាំ២០២៤ ក.ប.ទ. និងក្រសួងទទួលបន្ទុកវិស័យឌីជីថលនៃបណ្ដារដ្ឋសមាជិកអាស៊ាន បានពិភាក្សានិងអនុម័តលើឯកសារ “មគ្គទេសក៍អាស៊ានស្ដីពីអភិបាលកិច្ចនិងសីលធម៌បញ្ញាសិប្បនិម្មិត” សម្រាប់គ្រឹះស្ថានក្នុងតំបន់អនុវត្តដោយស្ម័គ្រចិត្តក្នុងការរចនា អភិវឌ្ឍ និងដាក់ឱ្យប្រើប្រព័ន្ធ AI បែបប្រពៃណីប្រកបដោយការទទួលខុសត្រូវ។ បន្ថែមលើនេះ ក្រសួងទទួលបន្ទុកវិស័យឌីជីថលនៃបណ្ដារដ្ឋសមាជិកអាស៊ាន បានមូលមតិគ្នាបង្កើត ក្រុមការងារអភិបាលកិច្ចបញ្ញាសិប្បនិម្មិត ដើម្បីសហការគ្នាលើកិច្ចការអភិបាលកិច្ចបញ្ញាសិប្បនិម្មិតក្នុងតំបន់ ហើយថ្មីៗនេះ ក្រុមការងារបានពិនិត្យពិភាក្សានិងឯកភាពលើសេចក្ដីព្រាងដំបូងនៃ “មគ្គទេសក៍បន្ថែមរបស់អាស៊ានស្ដីពីអភិបាលកិច្ចនិងសីលធម៌បញ្ញាសិប្បនិម្មិតសម្រាប់បញ្ញាសិប្បនិម្មិតបង្កើតមាតិកា” (“មគ្គទេសក៍បន្ថែម”) ដែលជាការបំពេញបន្ថែមលើមគ្គទេសក៍មុន ដើម្បីឆ្លើយតបនឹងការរីកដុះដាលនៃ GenAI។
ការពិគ្រោះយោបល់
ដើម្បីឱ្យសេចក្ដីព្រាង “មគ្គទេសក៍បន្ថែម” នេះកាន់តែល្អប្រសើរនិងគ្រប់ជ្រុងជ្រោយ ក្រសួងទទួលបន្ទុកវិស័យឌីជីថលនៃបណ្ដារដ្ឋសមាជិកអាស៊ានបានសម្រេចដាក់សេចក្ដីព្រាងដំបូងនៃ “មគ្គទេសក៍បន្ថែម” នេះពិគ្រោះយោបល់ជាមួយវិស័យឯកជនតាមប្រទេសរៀងៗខ្លួន ដោយត្រូវបូកសរុបលទ្ធផលនិងបញ្ជូនទៅអគ្គលេខាធិការដ្ឋានអាស៊ានត្រឹមថ្ងៃទី១៨ ខែតុលា ឆ្នាំ២០២៤។ ផ្អែកតាមអនុសាសន៍នៃគោលការណ៍ណែនាំរួម ការជ្រើសរើសដៃគូពិគ្រោះយោបល់នេះ រួមមាន៖
តាមរយៈសេចក្ដីជូនដំណឹងនេះ ក.ប.ទ. នឹងបើកពិគ្រោះយោបល់លើសេចក្ដីព្រាង “មគ្គទេសក៍បន្ថែមរបស់អាស៊ានស្ដីពីអភិបាលកិច្ចនិងសីលធម៌បញ្ញាសិប្បនិម្មិត សម្រាប់បញ្ញាសិប្បនិម្មិតបង្កើតមាតិកា” ដោយអញ្ជើញដៃគូពិគ្រោះយោបល់ដូចខាងលើ និងគ្រឹះស្ថាន អង្គការ ស្ថាប័ន ព្រមទាំងរូបវន្តបុគ្គលនិងនីតិបុគ្គលដែលមានចំណាប់អារម្មណ៍ទាំងអស់ ទាំងក្នុងវិស័យឯកជន វិស័យអប់រំស្រាវជ្រាវ និងសង្គមស៊ីវិល ចុះឈ្មោះតាមនីតិវិធីខាងក្រោម ដើម្បីទទួលបានសេចក្ដីព្រាង “មគ្គទេសក៍បន្ថែម” ដើម្បីពិនិត្យនិងផ្ដល់ធាតុចូល។
នីតិវិធីចូលរួមពិគ្រោះយោបល់
ជំហានបន្ទាប់
ក្រុមការងារជំនាញរបស់ ក.ប.ទ. នឹងសំយោគមតិយោបល់ភាគីពាក់ព័ន្ធ និងផ្ញើទៅកាន់អគ្គលេខាធិការដ្ឋានអាស៊ាន។ សេចក្ដីព្រាង “មគ្គទេសក៍បន្ថែម” អាចត្រូវបានកែសម្រួលជាបន្តបន្ទាប់ តាមការពិភាក្សានិងការឯកភាពរបស់ឧត្ដមន្ត្រីឌីជីថលអាស៊ាននិងការសម្រេចរបស់កិច្ចប្រជុំរដ្ឋមន្ត្រីឌីជីថលអាស៊ាន។
កំណត់សម្គាល់
អាស្រ័យហេតុនេះ សូមបុគ្គលពាក់ព័ន្ធនិងសាធារណជនទាំងអស់ មេត្តាជ្រាបជាព័ត៌មាន និងចូលរួមចុះឈ្មោះពិគ្រោះយោបល់តាមការគួរ។
