ឯកឧត្ដម ត្រាំ អីុវតឹក អញ្ជើញជាអធិបតីបើកសន្និបាតបូកសរុបលទ្ធផលការងារឆ្នាំ២០១៦ និងលើកទិសដៅការងារឆ្នាំ២០១៧ របស់ក្រសួងប្រៃសណីយ៍ និងទូរគមនាគមន៍
រាជធានីភ្នំពេញ៖ ព្រឹកថ្ងៃទី០៤ ខែមេសា ឆ្នាំ២០១៧ ឯកឧត្ដម ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកសន្និបាតបូកសរុបលទ្ធផលការងារឆ្នាំ២០១៦ និងទិសដៅការងារឆ្នាំ២០១៧ របស់ក្រសួងប្រៃសណីយ៍ និងទូរគមនាគមន៍ ដោយមានការអញ្ជើញចូលរួមពីថ្នាក់ដឹកនាំក្រសួង មន្រ្តីរាជការ និយោជិត ព្រមទាំងវត្តមានរបស់ ឯកឧត្តម លោកជំទាវ លោក លោកស្រី តំណាងក្រសួង-ស្ថាប័ន តំណាងប្រតិបត្តិករ ភ្ញៀវកិត្តិយសជាតិ-អន្តរជាតិ សរុបប្រមាណ ៦០០នាក់។
ថ្លែងក្នុងពិធីបើកអង្គសន្និបាត ឯកឧត្តមរដ្ឋមន្ត្រី បានមានប្រសាសន៍ថាក្រសួងតែងបានយកចិត្តទុកដាក់រៀបចំសន្និបាតបូកសរុបលទ្ធផលការងារប្រចាំឆ្នាំ ដោយបានប្រើប្រាស់ពេលវេលានេះធ្វើជាវេទិកានៃការជួបជុំគ្នា ដើម្បីធ្វើការបូកសរុប ត្រួតពិនិត្យ-វាយតម្លៃចំពោះលទ្ធផលការងារដែលសម្រេចបានក្នុងឆ្នាំកន្លងទៅ និងពិគ្រោះពិភាក្សាគ្នាលើកជាគំនិត ព្រមទាំងមានវិធានការរកដំណោះស្រាយ ដើម្បីកំណត់ឲ្យបាននូវទិសដៅ គោលដៅការងារសំខាន់ៗសម្រាប់អនុវត្តបន្ត និងដំណើរឆ្ពោះទៅមុខរបស់ក្រសួងពិសេសក្នុងបរិបទនៃការប្រែប្រួលយ៉ាងឆាប់រហ័សនៃវិស័យប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍និងព័ត៌មាន (ICT)។
ក្រោមការដឹកនាំដ៏ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា រាជរដ្ឋាភិបាលនីតិកាលទី៥ នៃរដ្ឋសភា បានដាក់ចេញនូវកម្មវិធីគោលនយោបាយក្នុងការបន្តដឹកនាំកសាងប្រទេសជាតិលើមាគ៌ានៃការអភិវឌ្ឍន៍ដោយបន្តជំរុញការអនុវត្តកំណែទម្រង់លើគ្រប់វិស័យឲ្យកាន់តែស៊ីជម្រៅ និងគ្រប់ជ្រុងជ្រោយ។ បន្តជំរុញការអភិវឌ្ឍន៍បច្ចេកវិទ្យាគមនាគមន៍ និងព័ត៌មានឲ្យមានលក្ខណៈទំនើប ប្រកបដោយគុណភាពស្របតាមស្តង់ដារអន្តរជាតិ មានតម្លៃប្រកួតប្រជែង និងមានសេវាគ្របដណ្តប់នៅទូទាំងប្រទេសដែលប្រជាជនទូទៅអាចប្រើប្រាស់បាន និងទទួលបានផលប្រយោជន៍គ្រប់ៗគ្នាពីវិស័យនេះ។
ទន្ទឹមនឹងលទ្ធផលការងារសំខាន់ៗដែលក្រសួងសម្រេចបានក្នុងរយៈពេលមួយឆ្នាំកន្លងមកនេះ មានដូចជា ការពង្រឹងការគ្រប់គ្រងរបស់ក្រសួង ការគ្រប់គ្រង និងអភិវឌ្ឍន៍ធនធានមនុស្ស ការបង្កលក្ខណៈងាយស្រួលដល់ដំណើរការការងាររបស់មន្រ្តីរាជការ និយោជិត និងការធ្វើអោយប្រសើរឡើងជាលំដាប់នៃវិស័យប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍ និងព័ត៌មាន (ICT) ក្រសួងនៅមានកិច្ចការចាំបាច់ដែលត្រូវបន្តដោះស្រាយ ហើយដែលអាចលើកយកមកពិភាក្សាមានដូចជាៈ
១. បន្តជំរុញការអភិវឌ្ឍន៍ធនធានមនុស្ស ប្រកបដោយប្រសិទ្ធិភាព ដើម្បីឆ្លើយតបទៅនឹងការវិវត្តន៍យ៉ាងឆាប់រហ័សនៃបច្ចេកវិទ្យា
២. ការស្វែងរកប្រភពថវិកា និងបច្ចេកទេសទ្រទ្រង់ដល់ការបណ្តុះបណ្តាលធនធានមនុស្សរបស់វិទ្យាស្ថានជាតិរបស់ក្រសួង
៣. បន្តការរៀបចំលិខិតបទដ្ឋានគតិយុត្តនានា ដែលពាក់ព័ន្ធវិស័យទាំងបី
៤. បន្តពង្រឹងយន្តការសម្របសម្រួល និងកិច្ចសហការរវាងប្រតិបត្តិករនិងប្រតិបត្តិករ និងបណ្តាស្ថាប័នពាក់ព័ន្ធ
៥. បន្តយន្តការគ្រប់គ្រងអង្គភាព ប្រកបដោយប្រសិទ្ធភាព តាមរចនាសម្ព័ន្ធដែលបានកែសម្រួល
៦. បន្តលើកកំពស់គុណភាពសេវា និងប្រសិទ្ធិភាពនៃបណ្តាញប្រៃសណីយ៍ ការពង្រឹងសមត្ថភាពក្នុងការអនុវត្ត និងគ្រប់គ្រងសេវាសកល
៧. បង្កើនកិច្ចសហប្រតិបត្តិការជាមួយប្រទេសនានាក្នុងតំបន់ និងស្ថាប័នអន្តរជាតិ
មុននឹងប្រកាសបើកកម្មវិធីសន្និបាត ឯកឧត្ដមរដ្ឋមន្ត្រី បានថ្លែងអំណរគុណ និងការកោតសរសើរដោយស្មោះចំពោះមន្រ្តីរាជការ និយោជិក របស់ក្រសួងប្រៃសណីយ៍ និងទូរគមនាគមន៍ ដែលបានខិតខំប្រឹងប្រែង អំណត់ព្យាយាម បំពេញភារកិច្ចដោយស្មារតីទទួលខុសត្រូវខ្ពស់ សម្រេចបានលទ្ធផលជាផ្លែផ្កាគួរជាទីមោទនៈ និងថ្លែងអំណរគុណចំពោះភ្ញៀវកិត្តិយស ប្រតិបត្តិករជាដៃគូទាំងអស់ដែលបានរួមសហការយ៉ាងជិតស្និតជាមួយក្រសួងនាពេលកន្លងមក៕
